En Wallon

Teaser Rallye de la Petite Reine 2018, 500 x 262

Teaser de la sixième édition du Rallye de la Petite Reine.On y voit dans l'ordre : Les Black Blues Brothers, la cie HURyCAN, le trio Wise Fools, la Cie Balancetoi, Johnny Alone et De Propere Fanfare van de Vieze Gasten dont on entend la musique.www.RallyeDeLaPetiteReine.be(y) (y) (y) Rallye de la Petite Reine 2018

Publiée par Rallye de la Petite Reine sur Jeudi 9 août 2018

 

Rallye d’èl pètite reine.

C’est l’sîzîme cô ç’n’annêe-chi qu’èl Centr’ Culturel organise èl Rallye d’èl pètite reine. Èl prumî cô, ç’astoût é 2011, é munme temps qu’èl Grand Prix du Criq’. I n’a foc deux côs què ça n’s’a nî faít. Èn belle occâsion pou les cîs qui aîmt’tè bî pourmèner à bicyclette. I z’aront munme èl chance dè vîr tout’ èn bènlêe dè spectac’, comme des jongleux, des acrobates, des èquilibris’su corde è su vélo…è munme des lanceux d’apiètes. Les moins vo.yants përront ètou faí l’tour é bus ou bî dvé é p’tit train.

C’est tèlmé bî péssé èç tour-là, qu’i y a munme é « camion balaí » comme dèvé les grandès courses : pou r’faí les fuites si vo z’avez malheureusmé èn chuine dvé vo pneu, r’mette èn maîlle à vo kaîne si elle èsquette ou bî cangî èn rûle valendrêe pa n’tchîte dè gâte d’èn cârrîre dè camp, mais ètou pou rasquèyî les çuns qui ont oyu les zûs pus grands qu’lun panche è qui sont d’jà kèrvés des quat’pattes après é sacant kilomet’.

È èç tour-là, pa ûsqu’i passe ?

On k’méche à l’césse dè l’hopital à neuf heûres pou d’aller à Âcr’, à l’anciènne ècole usquè c’est mènant èl local des scouts. Dè d’là, on d’ira jusqu’à l’césse à l’frontyîr’ dè Ghoy è d’Éverbeck (daulà, èn d’aller nî vo pourmèner dvé les pastur’ alétour, on n’saít jamaís, vo përrîs putète récontrer é taur grignâ qui d’é vauroût au canon d’vo maronne !).

À douze heûres, c’est mallette à l’césse Vandèrmeulen à Ogy (no vo conseìllons d’mingî èl kertin du Centr’ Culturel, faít aveu des bonnès affaíres dè no pat’lin). Daulà, i y âra comme animâtion des lanceux d’apiètes (méfyî-vous dè nî vo faí scalper).

On s’érira adon à l’plache dè L’sines é passant pa Wann’becq (Plache Jean Dèlhaye) è l’ancien terrain d’fotbal du Peûp’(é club bî counneû d’nos tayons.

Les çuns qui n’sont nî trop scrans përront co d’aller vîr l’Expo 18, Èl’sines vélo au Centr’ Culturel. Vo përrez vîr des vîx lîv’su l’bicyclette ou co boûr’ èn bîr’ « cyclis' » !

Tout ça mèttra é sacant kilomèt’ dvé les gambes des cyclis’. È èspèron’-lè, branmé d’plaísi à tertoute.

L’ateìllî wallon dè L’Sines

Theme by Anders Norén